हिमाल खरेल, भद्रपुर
झापाको भद्रपुरस्थित मेची रंगशालामा जारी ओम साई पाथिभरा हस्पिटल चन्द्रगढी महिला गोल्डकप फुटबल प्रतियोगिता अन्तर्गत आज अन्तिम क्वार्टरफाइनल खेल हुँदैछ। विभागीय टोली एपिएफ फुटबल क्लब र संकटा फुटबल क्लबबीच सेमिफाइनल प्रवेशका लागि प्रतिस्पर्धा हुने भएको छ। खेल दिउँसो ३ बजेबाट सुरु हुनेछ।
एपिएफले यसअघि ओखलढुंगाको पदमा स्पोर्टस् क्लबलाई ६-० गोल अन्तरले पराजित गरेको थियो। संकटा भने बाइ पाएर सिधै क्वार्टर फाइनलमा प्रवेश गरेको हो। दुवै टोली जितका लागि तयार रहेको जनाइएको छ।
गत कात्तिकमा झापामा भएको महिला गोल्डकपमा संकटाले घरेलु टोली झापा एफसीलाई ६-० गोलले हराउँदै सेमिफाइनलमा स्थान बनाएको थियो। महिला लिगमा संकटा विभागीय टिमबाहेक सबैभन्दा सशक्त टिम मानिन्छ। संकटाले यसअघि विभागीय टोली त्रिभुवन आर्मी क्लबलाई समेत पराजित गरिसकेको छ।
संकटाको टोलीमा ६ जना यु–२० राष्ट्रिय खेलाडी र भुटानकी एक राष्ट्रिय खेलाडी रहेका छन्। उदीयमान र अन्तर्राष्ट्रिय अनुभव भएका खेलाडीको उपस्थितिले टोलीलाई थप मजबुत बनाएको छ। यसले गर्दा संकटाको मनोबल उच्च रहेको बुझिन्छ।
यता, एपिएफ पनि जितका लागि उत्तिकै सक्षम देखिएको छ। एपिएफ टोलीमा राष्ट्रिय खेलाडी अनिता केसी, रश्मिकुमारी घिसिङ, गीता राना, रेनुका नगरकोटी, अनिता बस्नेत र स्टार गोलकिपर अञ्जना राना लगायत अनुभवी खेलाडी छन्। यी खेलाडीको अनुभवले टोलीलाई संकटाविरुद्ध जित निकाल्न मद्दत गर्ने विश्वास लिइएको छ।
आजको खेलको विजेताले बैशाख १२ गते सेमिफाइनलमा चर्च ब्वाइज युनाइटेडसँग प्रतिस्पर्धा गर्नेछ। प्रतियोगिताको विजेताले ११ लाख र दोस्रो हुने टोलीले ५ लाख रुपैयाँ र ट्रफी प्राप्त गर्नेछन्। आयोजक चन्द्रगढी युवा क्लबका अध्यक्ष रोहित सुब्बाका अनुसार यो पुरस्कार राशि महिला फुटबलमा नेपालकै सर्वाधिक हो। हरेक खेलको 'प्लेयर अफ द म्याच'ले ११ हजार रुपैयाँ पाउनेछन्।
प्रतियोगिताको उत्कृष्ट खेलाडीलाई एक लाख रुपैयाँ प्रदान गरिनेछ भने उत्कृष्ट गोलकिपर, डिफेन्डर, मिडफिल्डर, फरवार्ड र प्रशिक्षकले जनही २५ हजार रुपैयाँ पाउने सचिवालय प्रमुख हिमाल खरेलले जानकारी गराए। प्रतियोगिताको फाइनल खेल बैशाख १४ गते हुनेछ। यस प्रतियोगिताले नेपाली महिला फुटबलको विकासमा महत्वपूर्ण योगदान पुर्याउने अपेक्षा गरिएको छ।
